2016. godā svietejūt rodūšuos darbeibys 10. godadīnu, čellu trio „Melo-M” brauce īspaideigā koncertturnejā pa Latvejis piļsātom, klauseituojim pīduovojūt gon jaunus skaņdorbus, gan vysu laiku īcīneituokuos kompozicejis nu kolektiva repertuara.
10 godu darbeibys laikā čellu trio „Melo-M” nu it kai najaušys iniciativys palics par vīnu no vodūšajim Latvejis muzykys kolektivim i naformalu Latvejis muzykys vizeitkarti ari uorpus vaļsts rūbežim. Atzeimojūt karjerys laikā sasnāgtū, „Melo-M” sovim klauseituojim Latvejis piļsātuos pīduovuoja eipašu i svineigu atskotu iz padareitū.
Koncertūs skanēja publikys īcīneituokī skaņdorbi nu vysu „Melo-M” koncertprogramu, pīduovojūt gon latvīšu, gon pasauļa popmuzykys i roka dzīšmu versejis treis čellu izpiļdejumā, taipat klauseituojus prīcynuos ari „Melo-M” interpretacejis par pasauļa tautu muzykys zynomuokajom temom, opermuzykys skaņdorbi, televizejis serialu i puorraižu muzykys temys. Koncertā īvārojama vīta beja paradzāta ari „Melo-M” originalkompozicejom, kuru autors ir trio dybynuotuojs i muokslinīciskais vadeituojs Kārlis Auzāns.
Kūpā ar koncertūs daudz atskaņuotom dzīsmem eipaši itai turnejai „Melo-M” muziki sagatavuoja ari vairuokys seņ nadzierdātys kompozicejis i vairuokus pyrmatskaņuojumus.
„Ka pasaveram desmit godu senejā paguotnē, tad drūsai varim saceit, ka laiks paskriejs namonūt, bet padareits ir pateišom daudz – sagataveits gondreiž 10 dažaidu programu, kotru godu bejušs vairuokys desmitis koncertu Latvejā, regulari koncertiets uorzemuos – gon Eiropys vaļstīs, gon ūtrā pusē okeana, Krīvejis tuolēs i pat Vydsazejā. Pyrma īmam tuoļuok, padareitais ir juonūsvietej, i vyslobuok tū izdareit kūpā ar mums uzticeigajim klauseituojim Latvejis piļsātuos,” soka „Melo-M” muziki.
Jubileja turnejis koncertūs „Melo-M” sastuovā muzicēja čellisti Kārlis Auzāns, Mikelis Dobičins i Jānis Pauls. Ar jim kūpā izastuoja ari sytamūs instrumentu virtuozs Mikelis Vīte.
Foto: Melo-M
