Nu 15. da 21. oktobra Rēzeknē Latgolys viestnīceibā GORS nūtika niu jau ūtrais vargaņu muzykys festivals ORGANismi, kuruo muokslinīciskuo vadeituoja ir varganiste Iveta Apkalna. Festivala centrā — varganis kai koncertinstruments. Ūtruo festivala koncertus caurveja taišni “diveji” motivs — byušona iz skotivis divatā.
Leidzeigi kai organismi, varganis ir sarežgeiti radejumi, kurim rakstureiga vīlu i energejis maiņa. Spieļojūtīs ar vuordim organ (greku vol. varganis) i “organismi”, festivala muokslinīciskuo vadeituoja Iveta Apkalna ir īdūmuojuse turpynuot paruodeit vēļ nadazynuotuos vargaņu i cytu muokslu, godu symtu, stilu saspielis vareibys.
Festivala atkluošonys koncertā duetā skanieja varganis i klavīris — varganiste Iveta Apkalna sasaspieļuoja ar pianistu Juri Žvikovu.
Iveta Apkalna pyrmuo storp kolegim sajāmuse nūzeimeigū vuocu “ECHO Klassik” bolvu kategorejā “Lobuokuo atskaņuotuojmuokslinieca”. Juos rodūšajā biografejā ir sadarbeiba ar pasauļa lobuokajim orkestrim i dirigentim, tymā vydā ar Marisu Jansonu i Klaudio Abado.
Juris Žvikovs izastuojs kūpā ar “Sinfonietta Rīga”, Latvejis Nacionalū Simfoniskū orkestri, Līpuojis Simfoniskū orkestri, Nacionaluos operys orkestri, pīsadalejs koncertūs dažaidu kameransambļu sastuovūs, sasadorbuojs ar Latvejis muzikim N. Šnē, D. Krenbergu, S. Kļavu, M. Kūli, K. Putniņu i c., pīsadalejs daudzūs festivalūs i devs meistarklasis Vuocejā, Amerikā i cytur.
Foto: Andrejs Vasjukevičs/ Latgolys viestnīceiba GORS
