Latgolys viestnīceiba GORS izsludynoj kasgadejuos Latgalīšu kulturys goda bolvys “Boņuks”, kas ir zynomuokuo i gaideituokuo latgaliskuos kulturys nūtikšona, pretendentu pīsaceišonu par padareitū 2020. godā. Pretendentu pīsaceišona byus da 8. janvara. Muola statuetis par padareitū itūgod sajims 11 latgaliskuos kulturys aktivitatis, nūtikšonys, procesi i personeibys. “Boņuks” vēļ arviņ ir vīneiguo bolva, kura eipaši izceļ i gūdynoj sasnāgumus i padareitū latgaliskuos kulturys dzeivē. Bolvys padūšonys ceremoneja byus 28. februarī – tuos tīšraide byus nūsaverama škārsteiklā, bet kluotīnis sasatikšonys vareiba byus atkareiga nu epidemiologiskuos situacejis vaļstī.
Latgalīšu kulturys goda bolva teik taiseita ar mierki apkūpuot lobuokū pārnejā godā padareitū i lobuokuos nūtikšonys, gūdynuot Latgolys kulturys puorstuovus, popularizātuojus, veicynojūt turpmuoku jaunradis i kulturys daudzveideibys atteisteibu. Pretendentus bolvai var īsnēgt kategorejuos “Volūda. Literatura. Publicistika”, “Aktivitatis, Nūtikšonys. Personeibys” i “Audio. Video”, nu kuru bolvys žureja, piečuok izviertejūt pretendentus izvierzeis 30 nominantus i nu tūs 10 bolvys sajiemiejus – aktivitatis, personeibys, nūtikšonys, dorbus, bez kuru vysa vaira nabyutu īsadūmojama latgaliskuo kultura 2020. godā. Vīna bolva namaineigi tiks daškierta par myuža īguļdejumu latgalīšu kulturys atteisteibā. Aizpiļdeitys dasacejuma anketys bolvai “Boņuks 2020” tīšsaistis dasacejuma veidā, elektroniskā formatā ci pa postu Latgolys viestnīceiba GORS gaideis leidz 2021. goda 8. janvaram. Dasacejumus bolvai izvērtēs latgaliskū kulturvidi ci attīceigū bolvys lauku puorzynūša žureja vysmoz 25 ļaužu sastuovā. Bolvys pretendentu dasacejuma anketu škārsteiklā var atrast: http://bonuks.lv i http://latgalesgors.lv.
Kas gods Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnejā godā padareitū, nu ari latgalīšu kulturā aktivūs ļaužu, interesentu i atbaļsteituoju sasatikšonys i īsadvesmuošonys pasuokums. “Boņuks 2020” padūšonys ceremoneja paradzāta 2021. goda 28. februarī Latgolys viestnīceibā GORS i kai vysod tei byus nūsaverama tīšraidē, bet sasatikšona iz vītys atkareiga nu situacejis vaļstī i tymā breidī pastuovūšūs īrūbežuojumu. “Boņuks 2020” ceremonejis vadeišona itūreiz byus uzticāta komikim Juoņam Skutelim, kura dzymtuo puse ir Latgolā – Viļānu nūvoda Dekšuorēs.
Ituo goda suokumā Latgalīšu kulturys goda bolvys “Boņuks 2019” sajieme desmit aktivuokuos, spylgtuokuos i plotuokū rezonansi dabuojušuos latgaliskuos kulturys nūtikšonys, personeibys i projekti 2019. godā. Bolvys sajieme dzejneica Anna Rancāne i Daugovpiļs kulturys puorvaļde par dokumentalū stuostu par kordirigentis Terēzis Brokys myužu “Aiz azara bolti bārzi…”, dokumentaluo filma “Latgalīši Sibirī”, Egita Kancāne par stuostu kruojumu “Syltuo mola”, Evalda Vasilevska pīminis izstuode i gruomota “Evalds Vasilevskis”, grupa “Bez PVN” par dzīsmem, videoklipim i koncertu “Rūbeži”, Dagdys nūvoda folklorys centra vadeituoja Inta Viļuma i izdavums “Dagdys nūvoda pyura skreinis gruomota”, Latgolys kopeja grauzdātovys “KUUP COFFEE” saiminīki Oskars i Jolanta Maculeviči, latgalīšu filantrops Pīters Aloizs Ragaušs, Ligija Purinaša par dzejis kruojumu “Sīvīte” i žurnaliste Ausma Sprukte. Par myuža īguļdejumu latgalīšu kulturys atteisteibā tyka gūdynuots tieļnīks Indulis Folkmanis.
Latgalīšu kulturys goda bolva “Boņuks” pyrmū reizi tyka padūta 2009. godā, bet nu 2013. goda bolvu organizej Latgolys viestnīceibys GORS komanda, sasadorbojūt ar bīdreibu “Partitūra”. “Boņuks 2020” nūtikšonu atbolsta Vaļsts kulturkapitala fonda Latgolys kulturys programa ar A/S “Latvijas valsts meži” i Latgolys regiona atteisteibys agenturys atbolstu, kai ari Rēzeknis piļsātys dūme.
