Ūtrū reizi Latgolys viestnīceibā GORS gastieja Moskovys kameransamblis ar breineigu muziķu sastuovu “Classics-Art Ensemble”, snādzūt vīglu svātku programu “Muziki najūkoj” (Музыканты не шутят), kuruos pamatā ir daudzi jūku numeri ar kūšu i kruosainu muzyku. Programys beiguos zynomys džeza melodejis, bet natryuks ari muzykalu puorsteigumu. Koncertā izastuos ansambļa pylnais sastuovs.
Koncertprogramā izskanieja Johana Kristiana Baha, Ludviga van Bethovena, Feliksa Mendelsona, Žana Fransē, Malkolma Arnolda i cytu komponistu skaņdorbi.
“Classics-art Ensemble” sastuovs:
Aleksandrs Posikera – fagots, “Classics-art Ensemble” muokslinīciskais vadeituojs
Olga Posikera – tausteņinstrumenti, gitara
Antons Priščera – klarnete, tausteņinstrumenti, komponists
Mihails Štaņko – oboja, vaļsts kamerorkestra “Virtuozi Moskvi” solists
Tatjana Larina – flauta
Fjodors Jarovojs – mežrogs, vaļsts kamerorkestra “Virtuozi Moskvi” solists
Grupa “Classics-art Ensemble” rodusēs 2002. godā, i tuos dalinīki ir augstuokuo leimiņa solisti i Krīvejā īvāruojamu kolektivu dalinīki. Da šam sovys darbeibys laikā “Classics-art Ensemble” pīsadalejs daudzūs festivalūs, sajiems gūdolguotys vītys konkursūs i braucs turnejuos gon Krīvejā, gon uorpus juos, goda laikā snādzūt 70–80 koncertus. Da šam grupa izdavuse treis kamermuzykys diskus.
Sūpluok klasiskajai muzykai “Classics-art Ensemble” izpylda ari myusu dīnu autoru originalkompozicejis. Grupai koncertūs pateik interaktivitate – saruna ar klauseituojim, stuosti par spālātajim muzykys instrumentiem i pošu muzyku, izsverūt, ka kotrā izastuošonys reizē cīši svareigs ir koncerta stuosts.
Foto: Andrejs Vasjukevičs/ Latgolys viestnīceiba GORS
