2016. goda Leldīnis koncertā saime īskandynuoja jaunuo albuma “Vysi zīdi pļaveņā” dzīsmis. Albumā ir 17 latgalīšu tautysdzīšmu apdaris i latvīšu ziņgis. Koncertā pīsadalieja ari Gaigalovys pamatškolys bārnu folklorys kūpa "Purineņš".
Igauņu saimis kapelā nu Gaigalovys dorbojās pīci diveju paaudžu muzykanti: Rasma i Gunārs Igauņi, taipat ari jūs meitys Laima, Marta i Liene. Jī kūpā muzicej jau cīši ilgi, dūdūt cīši lelu īguļdejumu latgalīšu tautys muzykys populariziešonā i tradiceju podturiešonā, taipat ari ziņģu īraksteišonā i izpiļdeišonā. Praktiski vysa saime aktivi dorbojās muzykys jūmā i ari turpynoj pylnveiduot sovu muzykalū izgleiteibu.
Saime ir muziciejuse Lītovā, Igaunejā, Pūlejā, Uzbekejā, Italejā, Portugalē, Amerikā i cytur. Muzykanti ir daudzpuseigi i elasteigi, vīns nu izaicynuojumu saimei beja 2009. goda rudiņs, pīsadolūt LNT reikuotajā saimu dzīduošonys šovā „Dzīdūšuos saimis”.
Foto: Andrejs Vasjukevičs/ Latgolys viestnīceiba GORS
